靚聲歌后呂珊昨日為5月2至3日的《弦來最愛呂珊x管弦樂演唱會2015》舉行記者會，邀請李思捷、麥玲玲、謝雪心及麥長青等撐場。呂珊受訪時談到早前傳患上厭食症，她說：「我身體OK呀！可能我拍嘢唔食消夜，所以望落去瘦啲。（食肥自己開騷？）我覺得依家差唔多啦，有100磅，之前報道仲話我70、80磅，咁就死得啦！」

安德尊（右）狂寸李錦聯，呂珊則保持笑容。

傳不和的安德尊與李錦聯亦「冤家路窄」，司儀安德尊狂寸對方：「李錦聯，你點解會嚟嘅？你好得閒咩？都冇請到你。」李錦聯則反擊，指要在呂珊個唱上「唱衰」安德尊。未知是否被寸到冇癮，李錦聯下台便離場玩失蹤。