電影《葉問3》即將開拍，身為男主角的「宇宙最強」甄子丹大爆導演葉偉信要求他激減30磅，子丹即笑言若瘦30磅肯定要入院瞓床，故他正游說導演高抬貴手！

乘坐價值二百多萬寶馬出場的子丹，下車後即Chok樣，型到爆！

子丹全程讓Jocelyn翹實，認真Gentleman！

甄子丹昨日聯同名模Jocelyn在跑馬地馬場出席《寶馬香港打吡大賽》，第三度擔任「打吡大使」的子丹笑言上年抽籤失敗，今年再抽籤望做馬主，問到會否為馬匹改名「宇宙最強」，他說：「哈哈！好多人叫我改馬名做『宇宙最強』，但如果輸咗咁點算？所以抽到先再諗，謙虛啲！」

寧肥不瘦擔心大風吹

約兩星期後，子丹會拍攝電影《葉問3》，他大爆導演要求他減30磅：「我冇可能減30磅，會死！雖然再瘦啲好啲，但瘦30磅會入院瞓床，冇可能！我依家大概145磅！」他又指最瘦時只有128磅：「其實再瘦就畀風吹起，行唔到路喇！」

問到導演葉偉信會否因而讓步，他即大讚對方好易話為：「都係睇導演心情，佢好小朋友，佢可能突然會轉構思，要我增肥30磅做肥葉問！」他又表示年前拍電視劇《飛虎群英》時便試過增肥至160磅，被人叫「肥仔丹」。

Jocelyn生B等足十年

另外，喜愛馬匹的Jocelyn則覺得馬匹很靚，更曾試過與老公在夏威夷沙灘策騎，更在馬匹前錫錫影相。經常被追問生B的她表示錯過了馬年生B的時間，笑言預備做媽咪已足足10年：「依家主要都係專注事業先，順其自然啦！我相信命運，唔一定要指定邊個生肖。」