藝人鄭嘉穎及楊怡等昨日宣傳無綫新劇《天眼》，與楊怡在劇中「親熱」的嘉穎笑指羅仲謙冇監場，又自爆太忙而「練」出腹肌。

嘉穎與楊怡在活動期間不停密密斟，感情唔錯噃！

嘉穎在街頭派發紀念品，吸引大批市民圍觀。

林夏薇（左起）和楊怡等一眾演員齊齊扮挖鼻影相，非常搞笑！

無綫新劇《天眼》昨日於旺角舉行宣傳活動，鄭嘉穎、楊怡及林夏薇等均有出席。忙於拍攝新劇《殭》的嘉穎，在早上收工後到來，不過未見疲態，問到會否太累？他說：「咁冇計，都要做，《殭》日日都大通頂咁拍！」

羅仲謙冇監場

嘉穎指為配合角色需要而減了8至10磅，更瘦到「連朱古力都返晒嚟」，問到會否晒肌？他笑說：「唔係特登練，係Side Effect！」又透露在《天》劇與楊怡有感情線及火辣鏡頭，並打趣表示楊怡的男友羅仲謙當日未有監場：「我哋信任對方，拍之前都會溝通好，好順利同冇意外！」

楊怡在新年期間到朋友家拜年，又透露因未能與男友夾時間，故以電話向對方的父母拜年。對於有指她將做羊年新娘，她否認：「我又屬羊、又姓楊，唔使做羊年新娘啦！」

望新劇收視贏男友

至於新劇與羅仲謙擔正的《衝線》同期播出，問到會否擔心搶收視？她笑說：「我叫咗佢唔使留力喇！希望收視我高啲啦！」

林夏薇在劇中飾演女警，為揸槍揸得更型，她特意買假槍在家中對鏡練習，笑指半夜大叫「咪郁」，嚇親家中愛犬。