吳君如及王菀之（Ivana）前晚到觀塘戲院為《12金鴨》謝票，對於票房衝破二千萬，君如說：「我去咗美國成個星期，好心急返嚟，心掛掛票房。（想明年角逐最佳男主角？）我原本諗住報女主角，但諗諗吓，我係男人嚟喎！（為Ivana報女主角？）佢攞咗今年先！（Ivana獲提名今屆金像獎『最佳新演員』及『最佳女配角』？）明年開套動作武打賀歲片《12麒麟臂》，佢梗係做撞人嗰個啦！我捧佢做女主角，我有能力捧佢。」

君如（右）和Ivana向觀眾大派茶包。

Ivana與君如殺入戲院謝票。

Ivana得悉獲君如力捧時說：「聽到『捧』字我就定喇，多謝，下半生靠你喇！但我好重喎，依家冇一件衫着得落。觀眾都話我肥，我解釋係要有老闆娘氣勢。我打算七個星期唔食嘢，等塊面削番啲。（君如讚你『包米』勁，男友都好冧你身材？）暫時未嫌棄。」君如則自爆：「邊有男友鍾意洗衫板？我嗰個就鍾意手腳瘦，但要有『包米』！」