最近甩拖的鄭嘉穎前晚拍攝新劇時，揚言將感情事拋諸腦後，醉心工作療情傷，更否認被「速撇」：「係有共識咁分手！」而陳山聰則殭屍上身，與嘉穎惡鬥連場！

穿上厚衫的嘉穎打到流晒汗，唔怪得話係「Heavy嘢」啦！

鄭嘉穎和陳山聰前晚在荃灣拍攝無綫新劇《殭》打鬥場面，手執繡春刀的嘉穎不停怒劈殭屍山聰，而身手敏捷的山聰則左閃右避，幾招過後仍未分勝負。

「巨咪女」再見亦是朋友

過年後天氣逐漸回暖，令身穿厚衫的嘉穎打到大汗淋漓。問到感情狀況，最近甩拖的他稱現時欲專注工作：「開工就唔好搞咁多嘢住喇，開完工先算！（畀啲空間你？）梗係要畀啲空間啦，成件事都玩完啦！」又坦言與「巨咪女」仍然是朋友，又否認被對方「速撇」：「係有共識咁分手，覺得既然唔啱就咪拖泥帶水！」

談到新劇，嘉穎大呻新年後即要拍「Heavy嘢」，問到是否要吊威吔？他說：「又好少，因為公司收購咗間特技公司整CG，同埋威吔做唔到嗰種速度！」又坦言因殭屍題材，經常要開夜拍通宵。

戴個Con都搞成粒鐘

陳山聰則大讚劇集製作認真，劇組為幫他打造「殭屍眼」，專程從美國訂製全黑隱形眼鏡，他說：「頭一次係用咗八個字去戴，因為唔識戴，唔知點隊上去，睇嘢又好似戴咗黑超咁。」又表示期待4月中遠赴荷蘭取景：「唔使開工嘅話一定會跑吓步！」