電影《衝上雲霄》演員吳鎮宇與佘詩曼昨日到將軍澳謝票，鎮宇透露為謝票而押後返內地工作：「我返去拍戲，習慣早一、兩日返等自己Relax啲，唔想一落機就埋位。不過話要謝票嘛！我都謝埋！（做番啲咩令自己Relax啲？）以前返去按摩係首選，依家世風日下，放心唔落，怕畀人影咗相都唔知！（叫人返酒店按？）更加唔會！瞓着咗咪任影？我都係打坐算啦！（叫老婆幫你按？）佢湊仔都辛苦，又要跟功課。」

吳鎮宇與佘詩曼落區謝票。

派禮物兼任影唔嬲。

提到開拍《使徒行者》電影版的消息，阿佘稱期待與影帝合作：「未正式收到通知。（搵張家輝同劉青雲同你合作？）咁勁？希望係真啦！兩個我都未合作過，期待！一定會學到好多嘢。（嚟緊會全力進軍影壇？）我都想作多方面嘗試，都想試吓電影同舞台劇。」