「拖一拖,等一等,怕這點激情最後和緩」,這對《刻不容緩》的夢幻組合容祖兒及李克勤,相隔十多年激情依然未退,九月將會合體開騷,二人屆時更會犧牲色相,隨時谷胸現袋「凸」襲紅館。

祖兒呼籲粉絲幫手構思演唱會名稱。

容祖兒與李克勤將於九月合體在紅館開騷。

祖兒逗得克勤大利是,勁開心!

樂壇天后容祖兒與李克勤自從2004年合作開音樂會後,兩位唱得之人成為好友,一直相約聯手攻紅館開騷,怎料拖一拖、等一等便十一年了。終於在去年祖兒的生日會上,二人舊事重提,決定入紙紅館完成心願,最終成功爭取在今年九月在紅館合體開騷。

逗利是被催婚

雖然祖兒與男友劉浩龍正身在日本拍拖,但昨日仍不忘與克勤在Facebook建立「容祖兒.李克勤X紅館」專頁宣布喜訊,並叫粉絲幫手構思演唱會名稱。他們早前趁新年期間相約開會兼拜年,祖兒成功逗到克勤的大利是,克勤亦乘機催婚說:「逗埋今年好喇!好諗吓明年係咪派喇!」

拍短片「互寸」

祖兒與克勤為配合宣傳,更拍了一條「互寸」短片,祖兒揚言擔心要投「勤」所好學睇波,自言只識得已掛靴多年的前球王馬納當拿。她又牙擦擦指最近口才有進步:「開騷應該可以拍得住牙尖嘴利嘅克勤,不過非常擔心要跳《舊歡如夢》。」自問跳舞不如祖兒的克勤笑言鬥谷胸決勝負,祖兒即抵死反擊:「谷大個胸?我哋唔講呢啲,咁你係咪着『現袋褲』先?」