夏尉喻與關楚耀昨日踩入銅鑼灣鬧市派利是，夏尉喻更襯絕化身谷胸「利是封」，冧到一眾龍友暈陀陀！而事後有人發現利是封內只有一千韓圜（約7港元），但導演錢國偉表示有封五百蚊：「睇你好唔好彩抽到喇！」

以「紅噹噹」利是封造型上陣的夏尉喻，與關楚耀在鬧市宣傳新戲。

夏尉喻及關楚耀向途人大派利是，相當受歡迎。

關楚耀（Kelvin）、夏尉喻（Barbie）及導演錢國偉（Wilson）昨日在銅鑼灣宣傳新戲《台北夜蒲團團轉》，向市民大派利是，而夏尉喻更以「利是封Look」谷胸大晒3吋事業線，吸引大批龍友捧場，更有警察到場了解。Barbie自稱「利是封」後，突然跳去講真利是：「（利是）裏面真係有Cash o架！」令Kelvin疑似「諗錯隔籬」。問到拍親熱場面時，會否感覺益Kelvin？Barbie笑言平日拍戲都是捱打多：「今次終於可以打人，就係打Kelvin，我打咗佢N次！（打面？）係，佢硬食咗好多下！」

處女下海獻唱

Kelvin透露下月6日會在九龍灣為電影開騷獻唱，但Barbie坦言未試過公開唱歌：「未呀！大家要嚟捧吓場！」而Kelvin笑言有聽過對方的Rap短片。期間，Kelvin突然感到有人踢他的屁股，於是大叫：「邊個踢我籮柚！」回頭才發現導演錢國偉在背後，故與Barbie賣口乖向導演拜年。

堅稱宣傳策略

另外，有指昨日所派的利是並非港元，而是一千韓圜（約7港元）。Wilson接受電話訪問時坦言事前毫不知情：「其實係想開韓國版《夜蒲》，所以拎個意頭咁。不過啲利是有韓圜又有港紙嘅，仲有五百蚊同一千蚊o架！睇你好唔好彩抽到喇！」而監製唐家輝受訪時亦表示派一千韓圜是為討意頭：「唔係玩人，係宣傳策略嚟！」又指大部分利是都是10港元，總共用了幾萬元。

此外，同片的台灣女星雞排妹（鄭家純）及王思佳等亦以性感賀年裝向大家拜年，雞排妹更穿上超短旗袍谷胸，相當吸睛！