「樂壇校長」譚詠麟前晚演唱會邀請容祖兒（Joey）做嘉賓，二人大談往事又互笠高帽，身為前輩的校長更將Joey與男友劉浩龍擺上枱，笑指她在家中可以找男友練唱！

Joey代觀眾錫校長面珠，氹得校長騎騎笑！

邱子傑（左起）、李茂琪、李嘉欣及許晉亨結伴欣賞校長的演唱會。

劉浩龍拿着皇冠螢光棒做校長的小粉絲。

譚詠麟前晚在紅館舉行《銀河歲月40載》演唱會第十場，獲許晉亨李嘉欣夫婦、邱子傑夫婦、黃日華、鄧萃雯及賈思樂等前來捧場，而容祖兒則擔任表演嘉賓，男友劉浩龍亦有到場支持。適逢當晚為年初四，Joey特意披上大紅色外套登場，非常應節！

以為睇緊G-Dragon

校長介紹Joey出場時，不斷盛讚她是樂壇中最勤力的歌手之一，而Joey甫出場便跟校長和各位觀眾拜年，並笑說：「睇到台下啲觀眾拎住支皇冠螢光棒係咁Fing，好似睇緊G-Dragon咁！」她又透露已是第三次擔任校長的演唱會嘉賓，回想起第一次，她指當時獲校長借出私人髮型師為她整頭髮，非常慷慨！而她的髮型更弄得與校長一樣！

被歌迷螢光棒撞傷

之後二人合唱《偏愛》，Joey坦言：「呢首歌難度好高，我喺屋企要搵人陪我練！」轉數快的校長即抵死地說：「阿龍（劉浩龍）囉！」Joey不但未有介意，更大讚校長唱功勁：「真係冇你咁高音，所以你千祈唔好唔唱呀！」校長表示會為歌迷唱到八十歲。

另外，校長在演唱會期間走到觀眾席逗利是，但因場面太混亂，他被歌迷的螢光棒撞傷上唇，門牙更有少許血絲，一向敬業的他笑指傷勢無大礙，之後便繼續演出。