黃翠如與蕭正楠蜜運多時，不時大晒恩愛，翠如昨日出席活動，被小朋友公開催婚，她更揚言到男友家拜年時，廣受其屋企人歡迎。

黃翠如

翠如獲小朋友獻吻，一臉甜笑。

翠如向男友蕭正楠家人拜年，大受歡迎。

黃翠如及林盛斌（Bob）昨日到天水圍出席《領匯單車行大運》活動， 翠如為活動擔任評判，欣賞以賀年Look示人的小朋友踩三輪車，有小朋友在司儀阿Bob慫恿下，在台上叫翠如「快啲結婚」，又有小朋友搞笑地說：「快啲同邊個結婚！」

被催婚甜笑

翠如被小朋友公開催婚，非但未有黑面，更報以甜笑，她說：「我當係祝福語，就好似恭喜發財咁。（同咗男友屋企人拜年？）有呀，我哋各自喺對方屋企人面前好受歡迎！（親友催婚？）呢啲係例行公事啦！不過冇咁快，其實我哋兩家人都好相似，佢屋企人好錫我，我屋企人又好錫佢。（有傳你同男友家人唔啱傾？）傳嘅人一定唔了解我哋，我哋好開心！」

拍韓劇搵銀

驛馬星動的她又表示明日初五將離港工作：「我會去拍韓國電視台劇集，大概留半個月，之後再返港拍半個月。（男友會去韓國探班？）佢要拍劇呀！」