圈中有多位新手爸媽，其中內地女星楊冪日前與老公劉愷威湊女從北京返港過新年，在北京機場候機室更親自為囡囡換尿片，絕不假手於人！

舉家返港度歲的楊冪，在北京首都機場候機室跪下為囡囡換尿片，劉愷威從旁協助。

楊冪事業家庭兩邊忙，但忙得開心。（資料圖片）

劉丹

近年在內地爆紅的「三十億姐」楊冪去年6月誕下女兒小糯米，產後不久便與劉愷威齊齊搵奶粉錢，拍戲又拍劇吸金，工作以外的時間全奉獻給家庭，與老爺劉丹亦相處融洽，名副其實是時尚媽媽。

日前楊冪與劉愷威帶同小糯米現身北京首都機場VIP候機室，戴帽的楊冪素顏和便服打扮，雖然有保母同行，但新手媽媽楊冪對小糯米的一舉一動亦睇到實，換尿片時她更跪低幫手，為女兒撇下女星形象，而新手爸爸劉愷威亦盡顯慈父本色，從旁協助，他之後抱起小糯米，逗得老婆哈哈大笑。二人從未公開小糯米的真名及樣子，今次小糯米亦只被拍到頭髮。

劉丹掛住孫女

錫女錫到燶的楊冪早前在微博上載小糯米變身小熊貓的照片，祝大家新年快樂，前日她又在微博自爆蝦碌事：「把洗髮水當成洗面奶，給自己點讚。」雖然小糯米隨父母在北京居住，但一家三口亦趁新年特地回港向爺爺劉丹拜年。

劉丹昨日接受本報記者訪問時說：「係呀！佢哋返咗嚟，之前佢哋返咗北京。（掛住孫女？）梗係，佢一唔喺香港，成間屋都靜晒。」問到有否催兒媳再生B，他說：「唔使叫，佢哋有計劃。」而堪輿學家陳子才指兩人生女機會大：「佢哋都屬虎，今年係天喜桃花年，好大機會添丁，不過生女機會大啲！」

中槍戲似開水喉

另外，愷威近日憑內地劇《千金女賊》再爆紅，劇中他演的一場中槍戲，離奇地噴出血柱，似足水龍頭噴水，有網民笑指他像在流「紅酒」。

至於另一新手爸爸、台灣藝人陳建州（黑人）亦忙着幫老婆范瑋琪湊B，前日他上載餵囝囝飲奶的短片，大晒父愛。而上月產子的內地女星秦海璐正坐月，她表示過年忙湊仔，但因兒子的誕生而為新年增添喜慶。