「女神」岑麗香做飲食節目主持，更應邀試食賀年菜大飽口福！曾在外國居住的她笑言將桃花相貼在家中催旺桃花運，認真夠潮！

香香靠黐桃花相嚟催旺桃花，呢個方法認真新穎！

近日為飲食節目擔任主持的香香，面對眼前的賀年食物，忍不住大吃一口。

熱愛下廚的香香直言最叻整甜品，睇嚟做佢男朋友一定每日都Sweet到爆！

岑麗香早前為無綫飲食節目《明星愛廚房》擔任主持，與美食拉上關係，近日她為本報拍攝賀年專輯時更有口福一嘗賀年美食！曾在外國居住的她，過年也潮過人，每年都會收到身在溫哥華的媽咪寄給她的桃花相片，而她會將桃花相片打印出來，貼在家中一角催旺桃花運。問到媽媽是否催促她拍拖，香香說：「隨緣啦！唔急得，如果遇到好姻緣唔會抗拒。」她又自詡將來的男朋友一定很有口福，皆因她整甜品最叻，與她拍拖要做好增磅的心理準備。近日拍攝飲食節目的她雖然有做運動，但也增胖了五磅，她說：「拍節目真係由朝食到晚，條圍裙原本好啱身，後來愈嚟愈窄！」

飲食節目豐富閱歷

提到工作，首次擔任主持的香香坦言在節目中訪問了不同嘉賓，豐富了她的人生閱歷及令她重拾真我：「自己中文唔好，拍劇有時間都攞嚟背稿，所以冇乜時間同人溝通，慢慢就變成宅女，初時做主持都驚中文唔好講錯嘢，但係麥包（麥長青）幫我好多！每集都有好多唔同嘅嘉賓，主持節目之後識咗好多朋友，聽佢哋嘅故事，自己亦講吓自己嘅遭遇，節目豐富咗我嘅人生，覺得搵番以前嘅自己。」