視后胡杏兒近月與金融才俊男友Phil打得火熱，前晚出席農曆新年倒數活動時甜放「幸福閃光彈」，在揮春寫上「杏福快樂」表心迹，又自爆會跟未來奶奶拜年，同場的好友胡定欣也忍不住催她盡快於羊年結婚！

杏兒愛得咁閃，下年派得兩封利是未呀？

胡定欣（左起）、張繼聰、胡杏兒和陳日豐即席揮毫，杏兒更寫下「杏福快樂」！

定欣穿背心連身短裙表演，與粉絲迎接新年！

胡杏兒前晚與好友胡定欣、張繼聰及黃美棋等到荃灣出席農曆新年倒數活動，身穿白色連身裙的杏兒晒美腿，提起金融才俊男友Phil即「含春甜笑」，大會安排眾星在台上寫揮春時，杏兒玩食字寫上「杏福快樂」，定欣乘機向她催婚，望住對方笑說：「希望今年身邊會有喜事發生啦！我唔會追過你嘅！」其後杏兒獻唱國語歌《我的歌聲裡》向男友隔空示愛！

去「奶奶」屋企拜年

杏兒受訪時被問到為何寫「杏福快樂」，她即發放「閃光彈」說：「係大會叫我寫，但我都覺得係（幸福）嘅！希望新一年樣樣都順利！（感情呢？）好開心！再開心就應該冇得再開心喇！（Ready結婚？）嘩！太快喇！要拍吓拖先。（媽咪催婚？）有少少啦！不過要再相處吓先，有見過雙方家長，會去佢屋企拜年。（準備咩畀對方家長？）小小心意，係食得嘅嘢。（下年同男友派利是？）未諗呀！如果係（結婚）到時你哋一定會知啦！」問到活動後會否與男友行花市？她搞笑說：「會唔會太激動？不過都想嘅！」

黃美棋着紅底

而美棋梳了一個「春麗頭」大晒青春活力，她笑言希望三十歲前結婚生仔，尚有五年時間逗利是！提到新春習俗，她自爆已穿上紅色內褲以及不會洗頭：「雖然成頭Spray，但都唔洗頭住，呢啲嘢信則有不信則無！（新年點過？）放四日假同親戚拜年。（去緋聞男友鍾健威屋企拜年？）睇吓佢方唔方便先！」

張繼聰則表示利是交由老婆謝安琪負責：「啲錢都係畀晒佢啦！（出埠玩？）唔啦，初四要開工，忙到六月。（過肥年？）肥少少啦！肥喺個心度！今年封咗兩百蚊利是畀囝囝，佢問我可唔可以買到法拉利，我話你可以試吓囉！」