歌手鄧麗欣（Stephy）重視傳統，認為新年與家人團年最重要，不論多忙亦會抽空陪家人。早前到內地發展的Stephy經過兩年洗禮後，心態上不再急進：「因為叻人太多，追唔到咁多人，只能超越自己，同埋事業係漫長，要播種等收成，唔急得！」

為事業搏殺的Stephy認為婚姻大事唔急得，繼續享受甜蜜戀愛。

工作上不能心急，愛情亦如是，面對Cookies隊友逐個出嫁，身為隊長的Stephy並不覺得自己落後：「結婚唔係賽跑，唔使鬥快。」與男友方力申成功跨過七年之癢，Stephy認為不一定靠一紙婚書確立關係：「最緊要係相愛同開心。」並笑言兩人已像老夫老妻。