去年齊齊脫「獨」的名模熊黛林（Lynn）與Jessica C.（JC），當然希望羊年繼續與男友甜甜蜜蜜！Lynn計劃與男友郭可頌於兩年內結婚，JC則為男友安志杰將香港定為工作基地，實行跟住男友走！

JC甘願為男友安志杰「定下來」在港發展，有情飲水飽！

Lynn計劃於兩年內結婚，唔知男友郭可頌收到未呢？

鬼妹仔性格的JC暢談與男友的Sweet事，一副冧樣！

今期《好報》除報道張智霖大豐收外，亦有Lynn及JC大方談情。

去年覓得真愛的熊黛林及JC早前接受《好報》專訪，二人同樣愛得高調，幸福之情不言而喻！近年主力在內地發展的Lynn，為男友郭可頌不惜中港兩邊走。問到分隔兩地會否難以維繫？Lynn說：「冇乜特別，大家有共識，都知道要努力，只好盡量抽出時間。」

單方面待嫁

Lynn大讚男友勤力上進又孝順，並努力為將來。問到會否閃婚？她甜笑說：「依家感情幾好，但唔會做羊年新娘，我鍾意細水長流，大家仲喺觀察階段，都有諗過兩年內結婚，呢個係我自己諗，都唔知人哋點諗。」

「煲冬瓜」唔逼得

至於簽了數部內地電影合約的JC，為爭取時間與男友安志杰相見，已決心把香港定為工作基地，有需要才往內地，實行「嫁雞隨雞」！她又決心學好普通話，問到會否要求男友擔任其私人導師？她說：「我有時會問佢，但我哋用英文溝通真係易好多，我唔想令佢覺得同我傾偈變成工作，唔想逼佢！」