歌手陳詩慧（Eva）年初獲蕭定一睇中簽約成為旗下藝人，出道六年只推出一張唱片的Eav希望再出碟，在富裕家庭長大的她否認發明星夢。

生活無憂的Eva堅持為理想奮鬥。

陳詩慧（Eva）於2008年以環球歌手出道，雖然成功推出處女專輯，卻遇上「四大」版稅問題，令工作量及曝光率大減，約滿後轉投電視台做幕後，近日終憑歌曲《I'll Be There》彈起，更被蕭定一羅致作多方面發展，性格率直的她感激老闆說：「老闆開嘅條件好好，相信冇第二間公司會有呢個條件。」

由於Eva生於富裕家庭，問到是否因沒有家庭負擔才堅持發明星夢？她說：「我從來都冇發過明星夢，唔係發明星夢嘅人，我真係好鍾意寫歌、唱歌，係兩樣嘢。」她隨即解釋「發明星夢」：「發明星夢嘅人通常都好靚，我咁嘅質素冇可能發明星夢。」接住笑說：「我係實力偶像派。」

曾為祖兒作歌

曾為樂壇天后容祖兒作歌的她承認過去多年都是靠父母接濟，亦曾遭雙親施壓接手家族生意，她說：「佢哋成日擔心我，知呢行支出好大，尤其前公司有啲風波，嗰時真係同我講唔可以再咁落去，好彩皇天不負有心人。」