獲封為「深圳大學最美校花」　的溫心由內地南下來港發展，演戲出身的她將初試啼Sing進軍樂壇，並找來兩位前輩吳克羣及胡彥斌惡補歌藝，誓要在港唱出名堂！

樣子甜美的溫心虛心學習，為闖樂壇做足準備。

溫心演出經驗豐富，難怪表情多多。

內地藝人溫心在深圳大學讀書時，因樣子甜美獲封「最美校花」，風頭由校園席捲網絡，最終被公司老闆睇中入行。今年她將來港發展，與李元玲及許雅婷等三位成員組成女子組合「少女標本」殺入樂壇！

演而優唱出未來

隻身來港發展的溫心雖在內地演出經驗豐富，惟今次踩過界來港唱歌可謂壓力不小：「之前喺內地以演員身份拍咗幾套戲做主角，其中一部戲《女生宿舍》試過嚟香港做學術交流，今年會以歌手形式喺香港發展。（唱歌得唔得？）見仁見智啦！壓力當然有，因為自己專長係拍戲、跳舞，但都好鍾意唱歌，我畀自己規劃係全方位發展。」

型男吳克羣教路

作為樂壇初哥的溫心事前做足功課向台灣型男吳克羣及內地音樂才子胡彥斌偷師：「出歌前有問過朋友吳克羣、胡彥斌呀，都畀咗好多專業意見。」至於新歌《剛剛》由容祖兒御用監製舒文打造：「呢隻單曲比較輕快、少女啲，講少女經歷初戀，冇乜壓力咁揸住車去遊山玩水咁，同時領悟人生觀點，自己都未試過咁，所以錄音時好難體會到心情，就幻想自己揸緊車。」