黃美棋日前於威尼斯拍攝旅遊節目，在「水都之旅」惹桃花，先於高空三萬呎「畀仔撩」，抵埗後更遇上靚仔快閃黨「攝鏡」。但美棋又自爆「樂極生悲」不慎拉傷頸，更花上近千元醫藥費！

慳家的黃美棋指拍攝時才坐貢多拉，出外閒逛時只坐廿蚊的普通船過河。

黃美棋用「自拍神棍」到處拍照，竟遇上靚仔快閃黨「攝鏡」。

美棋BB自爆在當地拍攝首日在樓梯跣倒，導致拉傷頸要往醫院求醫。

有「宅男女神」之稱的美棋BB，日前遠赴「水都」威尼斯為有線拍攝旅遊節目，外形嬌小可愛的她自爆於機艙內被「異國型佬」搭訕：「坐隔籬嘅澳洲老外上機後不停撩我講嘢，又問我好多問題。佢落機前仲攞個相機出嚟狂自拍，但我唔太習慣同陌生人傾偈，所以扮瞓覺唔太睬佢。」

她到埗後以「自拍神棍」到處拍照，竟遇上靚仔快閃黨「攝鏡」：「舉機後突然有班外國後生仔亂入鏡，咁咪一齊合照囉！」問到屢有「艷遇」的她有否向緋聞男友鍾健威報告？她自爆唔驚對方呷醋：「同佢係朋友，唔使交代咁多嘅！」

樓梯跣倒傷頸

談到拍攝時有何難忘事？美棋BB即自爆於當地正式拍攝首日即拉傷頸，入院後更與護士雞同鴨講：「話明係水都，我就喺樓梯畀水跣倒，仲拉親頸嘅肌肉！跟住愈拍愈痛，連頸都郁唔到。入到醫院對護士講足一大輪，連翻譯軟件都用埋。之後醫生問我用唔用頸箍，最後我拒絕咗！」

醫院似博物館

樂觀的她又笑稱花費近千元醫藥費到醫院「觀光」：「間醫院靚到博物館咁，又大又靚！睇完醫生後，見識到人哋先進嘅醫療設施。」她又自爆慳家：「去到水都一定要坐吓船仔！不過坐正統貢多拉要八百蚊（港元），所以我揀咗坐廿蚊嘅普通船過河，雖然得一分鐘，但都好開心！」