歌手J.Arie不經不覺已出道兩年，雖然外界一直說廣東歌市場小，香港樂壇難生存，但她卻不同意，更希望未來可以出一張所有歌曲都由她創作的專輯，讓音樂留在別人心中。

出道兩年的J.Arie希望推出「自家製」、原汁原味的專輯。

醉心音樂的J.Arie最想嘗試跳爵士舞，因為夠型！

J.Arie認為香港仍有很多出色的音樂人。

出道兩年的創作歌手J.Arie（雷琛瑜）自覺不再是新人，所以2015年有一種上了戰場的感覺，她說：「今年想擺更多時間喺寫歌方面，好想做一張專輯係成隻碟入面嘅歌都係自己創作，特別想作啲中板快歌，好似MJ同貓王嘅歌咁。填詞方面，因為需要好高造詣同人生閱歷，所以未諗住。」

Keep住八卦攞靈感

除了聽歌啟發靈感外，她也會保持「八卦」，多感受身邊事物，令自己有更多想法。問到會否嘗試跳舞，她表示知道現在流行韓國組合的舞蹈，但笑說：「我比較喜歡爵士舞，唔一定成隻歌都Keep住跳，可能只係跳幾Part好型嘅動作。」

除了音樂，去年她亦拍了兩套電影，並會於今年上映，她說：「希望大家喺電影中見到不一樣嘅我，角色同平時嘅我有好大反差。」又透露拍電影學會了如何放大生活中的情緒，她說：「我將呢個技巧套用咗喺唱歌上，幫助到我激發情緒，更投入！」

「唔好埋沒音樂人」

對於很多人說在香港樂壇愈來愈難生存，她並不認同：「我唔會放棄廣東歌！個個都知80至90年代廣東歌係最輝煌嘅，但其實依家都有好多出色嘅音樂人，大家唔好埋沒咗！我覺得依家個個都傾向『睇』歌，可能就咁睇個MV，覺得靚同得意，但就冇真係去聽首歌！」