張智霖（Chilam）與袁詠儀前晚相約好友慶祝結婚14周年，為答謝太太多年來風雨同路，Chilam出動一招名店「任碌」，更許下承諾，結婚廿周年將舉辦盛大派對冧老婆！

與好友飲飽食醉後，Chilam與蔡一智太太周雪芳擁抱道別。

靚靚獲老公送名牌又有花收，認真幸福。

Chilam夫婦在社交網上載晒V照！

沈嘉偉駕駛名車接載豆斗回家。

Chilam夫婦歎法國菜慶祝結婚14周年，其後駕車返歸。

袁詠儀（靚靚）和Chilam於1992年拍攝電影《邊城浪子》時撻着，至2001年秘密在外國註冊結婚，由相戀到結婚，一直恩愛如昔。去年Chilam在演唱會上向愛妻大唱冧歌，真情剖白多年來的苦與樂，令靚靚哭成淚人，直言冇嫁錯！前日正值兩人結婚14周年，愛熱鬧的他們撇甩8歲愛子張慕童，相約邱淑貞、沈嘉偉夫婦、蔡一智夫婦等在跑馬地歎法國菜。

廿周年開大型派對

一行人邊飲邊傾，至凌晨12時盡興離場，High爆的Chilam和靚靚擁抱告別好友，隨即登上停泊在餐廳外的法拉利跑車，臨上車前被問到送甚麼禮物給太太，他們異口同聲說：「好多呀！」靚靚更補充：「好開心呀！」事實上Chilam為賀結婚周年，一點也不手緊，日前約太太一同行街，讓靚靚在名店任碌卡，自己只負責簽名。

「車隊」變布景板

其後Chilam接受電話訪問，講到結婚周年，他說：「其實都係前一晚大家傾傾吓約咗出嚟，順便想多謝豆斗（邱淑貞）為咗我哋兩公婆東山復出做節目嘉賓。」至於與太太相知相惜14載，Chilam感性地說：「我好多謝佢畀咗個天真活潑嘅小朋友畀我，有咗家庭令我做嘢冇後顧之憂。（會唔會搞個大型派對慶祝？）想等結婚廿周年先，我哋漫漫長路，有排行，唔使急！」

另外，當晚眾愛車之人相會，分別駕駛數百萬港元的法拉利及林寶堅尼名貴跑車現身，四架名車停泊於跑馬地街頭即成為「景點」，吸引不少途人及路過小朋友，當「車隊」如布景板般拍照留念。