朱咪咪紅館騷尾場獲兩位寶貝仔上台力撐，身為朱咪咪丈夫堂弟兼嘉賓的馬德鐘身形一向高大威猛，卻不敵咪咪姐細仔騷胸肌兼「震波」，睇嚟連「叔叔」都冇面畀！

咪咪姐身穿波點裙扮小鳳姐的經典造型。

朱咪咪細仔（右）在「叔叔」馬德鐘面前除衫露兩手。

面對咪咪姐細仔的震波「攻擊」，「叔叔」馬德鐘不禁摸其結實胸肌。

連續兩場《朱咪咪我做晒演唱會香港站》前晚在紅館舉行尾場，兩場嘉賓均是馬德鐘及被咪咪姐封為「80後組合」的胡楓（修哥）和譚炳文，修哥和炳哥的「都敏俊」扮相維肖維妙。至於馬德鐘與朱咪咪的老公是堂兄弟，所以他上台時直呼咪咪姐做「阿嫂」！

除衫露兩手

而咪咪姐的兩名兒子專程來捧場，咪咪姐先介紹兩個寶貝仔上台：「平時我演唱會多數都係大仔上台。」先上台的長子身形未及叔叔馬德鐘高大，被馬德鐘指遺傳不到優良血統，咪咪姐即為兒子護航：「你咪咁傷啲仔心喎！」及後高大健碩的細仔出現，馬德鐘即說：「呢個就有馬家血統！」細仔更即場脫掉外衫，僅穿背心大騷胸肌兼「震波」，在旁的咪咪姐笑說：「阿仔快啲收埋啦，唔好令叔叔自卑！」引來全場爆笑。

禁兩子入行

在慶功宴上，問到咪咪姐可會讓兒子入行？她決絕地說：「No！」更爆大仔當年看到謝霆鋒走紅時曾說要做謝霆鋒：「我同佢講，香港幾百萬人有幾多個謝霆鋒？其他想做又做唔成，分分鐘餓死，所以佢哋就打消呢個念頭！」