蔣家旻 羅天宇共度情人節

蔣家旻與羅天宇等一眾《愛．回家》演員昨日出席長者盆菜宴，蔣家旻以「了解中的朋友」來形容被撞破與她拖手的數碼電台DJ Martin（林路寶）：「呢位朋友識咗好耐，但唔係成日聯絡，唔係好了解。（怕戀情見光死？）唔係，我哋平常心。（情人節點過？）同羅天宇過！」

封定大利是

此外，同劇的劉丹、徐榮及林漪娸等昨日亦到銅鑼灣及灣仔花車巡遊，並向市民派發利是封，大受歡迎。劉丹透露仍未夾到期與乖仔劉愷威及新抱楊冪食團年飯：「佢哋兩個喺唔同地方拍戲，都未知幾時拍完。（佢哋新年放假陪你？）睇佢哋工作安排，但孫女睇視像見到爹哋、媽咪好雀躍，我預咗封大利是畀孫女，銀碼由老婆揸主意，佢媽咪喺倫敦、北京買好多衫畀佢，但唔啱季節，收起一排，攞番出嚟已經唔啱着，我老婆同個女都有買衫同玩具畀孫女，我哋錫到佢燶！」

結局唔捨得

對於有指劇集將進入倒數階段，丹爺說：「我都唔知，真嘅話一定唔捨得，但慶幸嘅係《真情》、《皆大歡喜》我都有份做！」