剛在紅館完成個唱幾日的楊千嬅前晚慶生再度加場，撇下囝囝Torres與老公丁子高「婦唱夫隨」，丁生更情深向丁太高呼「I Love You」，令她既感動又驚喜。

楊千嬅與丁子高撇下囝囝結伴睇舞台劇，享受二人世界。

昨日41歲生日的「丁太」楊千嬅前晚在中環一間餐廳舉行「生日演唱會」，到賀嘉賓包括陳奕迅、蘇永康、梁漢文、黎芷珊、森美和小儀等，而與千嬅同年同月同日生的音樂人Eric Kwok（郭偉亮）帶同太太葉佩雯現身，兩個壽星齊齊切蛋糕。由於生日會於十時半開始，故仍是幼稚園生的囝囝Torres則未有現身。

婦唱夫隨

日前剛完成7場演唱會的千嬅雖然感冒未清，但唱足七場個唱的她似乎仍未夠喉，打頭陣獻聲之餘，更愈唱愈勇做「咪霸」，連老公丁子高都突然歌癮起，化身「情歌王子」唱出黎明的《夏日傾情》，一句「I Love You，你會否聽見嗎？」再加上代表一家三口的「M.T.R Family Rock」紫色生日蛋糕，毫無保留地向千嬅表達愛意。丁子高亦在Instagram留言：「每次見到你笑成咁......就係我最大嘅成就。老婆，生日快樂！」

小儀送「蕉」

一眾好友亦在網上為千嬅送上祝福，小儀接受電話訪問時說：「大家一齊傾偈食飯。（送咩禮物？）冇呀！送咗『兩梳蕉』，希望佢身體健康、幸福快樂，仲有追B女成功，做朋友都知佢好鍾意女。」

此外，千嬅昨晚與丁子高結伴欣賞劉嘉玲與梁家輝合演的舞台劇《杜老誌》，千嬅說：「睇騷當慶生，我想睇好耐，之前開騷又拍戲，尾場嚟睇當慶祝！」