祖兒有份客串、與劉浩龍「情侶檔」參演的《12金鴨》，一班演員包括古天樂與吳君如等昨日落區宣傳，大會邀得兩名半裸男揭開2.5米高的金鴨。君如自爆豪擲數十萬元在年宵開舖谷戲，其他演員更隨時殺入維園：「13號開張，我會親自去睇檔，計埋裝修使咗好多錢，攤位就算唔係全場最靚，都會好金！」當男模上台介紹年宵檔售賣的福袋時，君如即眼甘甘勁High，並透露福袋內有男女通殺的法寶：「我哋有孖煙囱賣，仲有T-back喎！唔係着上身嗰啲，係飲嗰啲Tea Bag（茶包）！」還指茶包最啱古仔：「都係要Chok吓Chok吓！司儀話飲咗壯陽，我都要預啲畀阿爸（夏春秋），佢80幾歲需要呀！」

君如與古天樂落區谷戲，並宣布年宵賣福袋當宣傳。

劉浩龍（左）即場「試着」，唔知有冇嚇親蔡瀚億？

當裸男上台介紹時，君如牛咁眼望實勁High！

君如斥數十萬元投檔裝修，笑言唔賣得都睇得。

另外，「楊過」古仔與「小龍女」李若彤於《12金鴨》中再續情緣，君如透露曾問兩人當年有否擦出愛火花：「佢話古仔都係十六年如一日，一個人匿埋一邊。」同樣演過「小龍女」的陳妍希跟古仔未有對手戲，君如否認怕兩人再傳緋聞，又力撐妍希冇包包面。