「師兄」劉浩龍、蔡瀚億與姜皓文等到銅鑼灣宣傳新片《12金鴨》，師兄笑言會力撐君如的年宵攤位：「我會落維園幫手睇檔。（淨着孖煙囱？）之前君如叫我哋減磅，但成齣戲都唔使我除衫，年宵睇吓有冇機會脫一脫。（同祖兒情侶檔睇舖？）唔會囉！咁老土，我哋幾個男仔睇啦！」

劉浩龍在片中毋須露肉，笑言睇檔有需要時會不惜一脫！

有傳祖兒因師兄的關係才答允客串《12金鴨》，他即時否認：「呢樣嘢唔需要回應啦！（咁即係定唔係？）梗唔係啦！（你幫手拉攏，祖兒先肯做楊千嬅演唱會嘉賓？）唔係！我叫劉浩龍，唔係拉攏呀！」提到女友希望找個好歸宿及搞水底婚禮，師兄笑說：「冇咁快！做多幾年嘢先！（唔會龜縮啩？）我唔係龜，係鴨。」