女星莊思敏昨日以近八位數字的酬勞與經理人公司續約三年，她在記者會上展示其側身全裸的噴血海報，大騷美好身段及長腿，相片與當年莫文蔚的經典Look極為相似，她表示構思是寓意「重生」及會全身投入影壇！

身穿透視長裙的莊思敏將瞓身拍電影，畀心機呀！

莊思敏的噴血海報昨日正式曝光，美好身段及長腿殺死人！

莊思敏以八位數續約，既然咁高興，梗係要開香檳慶賀喇！

蕭定一希望莊思敏專心做演員，事業更上一層樓。

相似度95%
當年莫文蔚全裸上陣拍唱片封套，引來極大回響。

莊思敏昨日出席經理人續約典禮，宣布與中國3D數碼續約三年，並與老闆蕭定一為大型海報揭幕，只見相中的思敏全裸側身躺在梳化上，噴血程度爆燈，並寓意未來將全身投入電影發展及重生！會上播放了一段短片，片中思敏提及以前在模特兒公司曾被前經理人冷落，以及有指被要求陪客食飯等不快事。

控訴前經理人

提到全裸上陣，思敏表示當時怕穿崩而清場，三點僅以乳貼及T-back遮掩！至於疑似控訴前經理人，她直言曾有不愉快的經歷：「以往嘅不愉快係成長嘅階段。（陪客食飯？）冇！但感到被人投閒置散。」

她又透露正忙於拍新片《十月初五的月光》，並計劃今年集中火力在影圈發展，希望能參演不同類型的電影。她特別鳴謝緋聞男友葉念琛導演給予機會，今後會跟他繼續合作。

問到拍戲的性感尺度，她笑言未能像海報中全裸，但底線會視乎劇本及導演而調整，問到會否考慮接拍如《色，戒》的尺度？她笑說：「如果係李安同梁朝偉，你覺得有冇得諗？睇你信唔信個導演同劇本，依家好難定界線或底線，最後要靠溝通。」

唔抄人剃光頭

事後她在電話訪問上透露以近八位數酬勞續約，對於海報被指與莫文蔚的全裸照相似，她說：「可能大家都用長梳化，但冇特別模仿，亦冇抄襲嘅心態，拍攝時試過唔同角度同道具，都係呢個最好，我唔怕比較！（唔學佢剃光頭？）如果角色需要，我唔抗拒，但唔使為一個記招去剃光頭。」

另外，蕭定一被問到是否安排莊思敏做性感女星？他說：「佢專心做演員，就唔會介意性感，性感係視乎套戲係咪需要！」提到向亞視購買經典劇集，卻遭亞視執行董事葉家寶寸出手低，他解釋價錢以購買小時界定：「我做生意畀咗個合理價錢，佢哋自己考慮囉！（亞視未覆？）話等緊董事局開會，或者佢哋睇緊有冇白武士，有就唔需要我筆錢，冇咁快就需要我筆錢。」對於葉家寶要求版權起碼夠畀亞視兩、三個月人工，他笑說：「我唔知佢每個月出幾多錢糧！」