Jeana攬啜大龍鳳 「箭靶」袁嘉敏冇眼睇
近日「峰」頭一時無兩卻是非纏身的前港姐袁嘉敏，出席首映時被「死敵」何佩瑜（Jeana）與何浩文（Dominic）夾檔出招搶風頭！Dominic更於社交網鬧爆「小學雞」，網友即猜測矛頭是直指袁嘉敏！
何浩文（右起）拖實Jeana上台，袁嘉敏變「大茄」靠邊站。
袁嘉敏一度流露冇癮表情。
Jeana與何浩文一啜搶鏡。
Jeana與何浩文投入攬抱，袁嘉敏被當「透明」。
何浩文與杜汶澤你一言我一語，寸爆「小學雞八婆」。
DJ李志剛（右起）作狀「偷襲」何浩文，認真搞笑。
Jeana（右）獲友人驚喜送花。
袁嘉敏（Candy）解放34D驕人雙峰於新片《鴨王》露點演出，更與同片女星何佩瑜爭「峰」頭鬧不和。於片中與Candy激戰連場的糖妹舊愛何浩文，近日卻於Facebook疑似力數Candy，雖然他沒有開名，但網友已將矛頭鎖定Candy，身材火辣的Candy可謂「峰」煙四起。
其實Candy與Jeana的不和早已浮面，互相數爆，近日Dominic則在Facebook開腔大罵：「有問題就盡力自己解決唔好賴其他人，唔影響其他人做好自己呢啲都係做人嘅基本，我真係冇興趣玩埋啲小學雞遊戲。」又着對方應該問問身邊人，去了解為何被針對。留言一出，惹來不少網友估「所指是誰？」連嫩模鍾采羲都留言問發生何事，更有網友猜想是否跟是非多多的Candy有關。
懷疑你講緊條八婆
而曾與Candy合作的杜汶澤亦加多腳，留言回應Dominic，他寫道：「我懷疑你講緊一條八婆。」Dominic即搞笑請教應付招數，阿澤不諱言：「八婆係唔使對付嘅，因為點都唔會得，紅唔到係其次，最重要係，黐線唔單止影響其他人，自己亦唔見得開心。你當自己時運高，睇唔到。反正過客泥（嚟）嘅啫！理得佢！」Dominic回應指是為身邊人不值，阿澤則玄妙回應：「其他人同佢，就係佢哋之間嘅猿糞（緣分）。」獲阿澤鼓勵的Dominic更無奈留言：「原來係你唔搞人，人都係會搞你。」
疑似網上力數Candy的Dominic，前晚出席電影首映時，似乎要親身演繹「時運高，睇唔到」的道理，全程冷落Candy，而Candy的「死敵」Jeana更與Dominic十指緊扣到場，又攬又錫，明顯當Candy冇到。Jeana受訪期間更突然獲兩名女性友人送花，連環搶鏡！Jeana說：「唔係特登，我同Dominic識咗好多年，首次合作咁有Connect（連繫）。（拍拖？）順其自然。」又否認刻意孤立Candy：「合作講緣分。（仲係不和？）唔係，拍戲我都係對Dominic多啲。」此時Dominic「鴨王」上身揚言並非刻意冷落Candy，並說：「我哋戲入面都係客人關係，Suppose應該係咁。」
自稱唔覺被冷落
至於儼如變了布景板的Candy，卻死撐聲稱不覺得被冷落：「係咩？唔覺喎！我冇諗應該點企，不嬲都冇所謂。（覺得Jeana同何浩文攬錫故意搶鏡？）佢哋不嬲好朋友，情同兄妹，我冇諗咁多，唔通我掹開佢哋咩？」提到床戲由兩場加到六場的報道，她說：「導演係新導演，加加減減梗有，但有啲係即刻加，仲好激烈，我冇預計到，所以喊咗出嚟。」不願透露片酬的她承認拍完後曾返澳洲靜養，並揚言會繼續參與謝票。
