對動物充滿愛心的女星李曼筠（Maggie）早前到騎術學校習騎，她出動到薄荷糖及紅蘿蔔冧掂八歲良駒「Rugby仔」，「Rugby仔」更搞笑地「Chok樣扮可憐」！策騎上癮的Maggie很享受在沙場馳騁的感覺，希望練好騎術扮演古代女俠！

首次挑戰策騎的Maggie，事後向乖巧的「Rugby仔」獻吻。

Maggie希望向女俠之路出發，在電影中策馬奔馳。

家中養了四頭愛貓的Maggie，經常黐實貓貓Selfie。

馬房內有多匹駿馬，Maggie大讚馬匹極具靈性。

充分體驗策騎樂趣的Maggie，餵紅蘿蔔慰勞「Rugby仔」。

策騎裝備睇真啲！
準備好策騎裝備，Maggie就放心晒V唔怕受傷啦！

甚有愛心的「動漫Maggie」李曼筠一向喜愛動物，家中飼養了四隻愛貓，想不到她冧馬匹亦有一手！早前她到薄扶林公眾騎術學校習騎，獲安排八歲良駒「Rugby Heaven」以供練習，性格溫馴的「Rugby仔」起初比較冷漠，Maggie對牠又呵又錫，更出動到牠至愛的薄荷糖，「Rugby仔」吃糖後即時冧晒，對Maggie不時皺眉放電，練馬師笑言牠經常「Chok樣扮可憐」，相當得意！

情傾‧紅蘿蔔

其後Maggie戴上頭盔及換長褲正式練騎術，她與「Rugby仔」非常合拍，雖然策騎經驗不多，但最後仍順利兜了數圈，享受到策騎樂趣的Maggie更高興得振臂高呼！然後她到訪「Rugby仔」的「睡房」，並餵紅蘿蔔作慰勞，而其他馬格的馬匹得知有美食，亦紛紛好奇地探頭張望，場面搞笑！

設施‧夠完善

Maggie盛讚達奧運級數的策騎學校設施完善，令她一試上癮，並指「Rugby仔」相當可愛：「佢同我一樣鍾意食薄荷糖，而且好似玩遊戲機入Coin咁，行一陣就要食糖！」問到策騎後的感受？她笑言玩到Pat Pat痛：「開頭有少少緊張！諗緊隻馬會唔會唔鍾意我呢？之後佢都好乖，冇亂咁郁，我企喺佢旁邊，望到佢對眼，覺得佢好醒好有靈性！（玩完有冇周身痛？）第二朝發覺大髀同Pat Pat嘅肌肉拉緊晒，都有啲痛！其實騎嗰陣成個人都盡量放鬆，但對腳要特別用力畀指令，我仲驚佢接收唔到，所以好用力！」

下一站‧馬主

眼見同場有不同年齡人士報讀騎術課程，就連小朋友亦有份，令Maggie心郁郁想繼續學藝！自誇有天分的她希望可拍戲一展騎術：「呢度教授、安全同馬匹料理各方面都獲英國馬術協會認可，都想再嚟學騎術！之前我拍過古裝宮廷戲，但未有機會騎馬，希望之後可以演女俠策馬奔馳，嘩！諗起都覺得型。」問到會否想做馬主？熱愛動物的Maggie直言是好提議：「養馬係一件好快樂嘅事，但要儲吓錢同經驗先，暫時先享受做貓主。」

寵物情人

熱愛動物的Maggie火速與良駒「Rugby仔」成為好友，全因與家中四頭愛貓朝夕相處，訓練有素的她對動物更有耐性及愛心！出名是貓癡的Maggie笑言當正四隻貓咪加菲、囡囡、悠悠及豆豆如親生仔，每日都會發生不少趣事，「大仔」加菲更有情人的感覺，只因牠每朝都要錫錫，令Maggie甜入心！