江希文與女兒昨午二時許離開大宅往柴灣購物，期間接受記者訪問時，一度感觸哭起來。

江希文

記：胡漢清話你係戲子，日日帶女出騷？

江：我日日都係咁湊個女，又冇工人，唔通空氣湊佢咩？話我做騷？你問番佢邊個做騷啦？

記：胡生話希望你爸爸可以做監護人？

江：唔麻煩啲老人家啦！

記：對於將遭入稟禁霸大宅，有何打算？

江：冇回應，但想講當年我冇唔畀佢阿媽入屋攞嘢，只係胡漢清走咗出去，唔想蒙上「唔開門畀奶奶」呢個污點。

記：胡生話你想分佢身家？

江：係攞Child Support（子女撫養費），我同佢冇結婚，點會分身家。（贍養費傾成點?）交晒畀律師。其實個女好少提爸爸，因為佢晏起身，夜晚返嚟個女都瞓咗。

記：擔心胡漢清取回女兒的撫養權？

江：唔擔心，我都冇同佢結婚，佢冇撫養權，我有Sole Custody（單獨監護權），但佢可以嘗試去爭，冇所謂。我問心無愧，只想同個女安靜生活。（會返英國？）唔會。

記：之前你同胡生都有受傷照曝光？

江：唔知佢無啦啦點會有傷口。（此時有人協助她將物件放上車）識胡生到依家，佢從來唔會幫我拎嘢，永遠坐喺車度唔幫手。我對佢要求好低，肯做少少呢啲已經覺得佢係我老公。

記：覺得佢唔愛你？

江：（突然眼紅哭起來）係唔識愛我，覺得畀家用你、畀屋你住、畀車你、買隻戒指畀你就係幸福，佢唔明女人要咩，我需要關心同體恤，佢冇做過！

記：點解仲嫁佢？

江：因為好快有BB，未了解佢係咩人。（後悔？）冇，其實有個女已經好滿足，好安慰。上天賜個女畀我，如果我哋兩個相處唔到都冇辦法，最想係同個女好好生活落去。我由7月開始已經冇工人，日日都自己湊，其實唔想影響個女，但都影響咗，不過都好過有個人成日喺屋企講粗口同用暴力！