新城DJ路芙由主持到拍劇也非常成功，成功「入屋」的她工作接踵而來，更有人邀請她唱歌，分分鐘打入音樂界！形象搞笑的她，原來亦有運動型的一面，更非常注重健康。

體形略胖的路芙做起運動來有心有力！

形象搞笑的路芙最想演繹搞笑人物的內心。

路芙經常打泰拳、滑水和打乒乓球以保持身體健康。

路芙早前殺入電視圈拍攝劇集，除了提升知名度外，亦因而有更多出騷機會，她說：「最得意嘅係有人好大膽咁搵我做MC之餘，順便唱埋歌，我唱就冇壓力嘅，當係玩！（反應如何？）都OK嘅，不過總會有啲人喺度食緊嘢。」

拍劇外景最辛苦

她又提到未拍劇前曾聽過一些前輩指工作很辛苦，而且不定時，她卻說：「唔定時係真嘅，不過喺廠拍戲係舒服嘅！之前有場戲講我同陳明恩要喺三十幾度嘅街頭打交，最後我哋一個發燒、一個中暑，呢啲就叫辛苦喇！」問到日後會想嘗試怎樣的角色？她自認搞笑能力較強，但希望可演繹搞笑人物背後較內心的東西。

工作一籮籮的路芙閒時亦不忘做運動，希望可以強身健體，她說：「我主要係做三樣運動嘅啫，就係滑水、泰拳同打乒乓波，因為本身有啲長期病，醫生叫我做帶氧運動。」

戒食煎炸嘢減肥

她又坦言無意靠運動減肥，因早前做過基因測試，報告指出若她要減肥，每星期需要花六小時做運動，對她而言很困難，所以寧願在飲食方面入手，她說：「佢呢個測試仲可以幫你知道食啲咩嘢會唔肥，我由細到大都好鍾意食飯嘅，佢Check到我食飯或者澱粉質嘅嘢冇咁易肥，所以我可以狂食飯！不過就要戒食煎炸嘢。」