有「榕姨」之稱的性感女星黃榕,堅信性感得靚就冇問題,亦從不過問圈中是非。工作忙碌令她未有時間尋找「終身伴侶」,但她對愛情仍充滿信心,更坦言鍾情肌肉男,希望找到失去的安全感!

黃榕認為性感是一件好事,因此會繼續性感。

對於愛情,黃榕希望順其自然,但自爆鍾情大隻男。

黃榕(Gloria)從不怕別人目光,敢作敢為,直指性感是一件好事:「起碼我仲性感得起!」近年模界「人才濟濟」,為求上位不惜奇招盡出,Gloria坦言睇唔過眼:「唔應該過咗底線囉!我唔會怕啲是是非非,我覺得佢哋變咗低俗嘅性感!性感係要靚,唔一定要低胸,露背、露吓長腿都係唔錯嘅選擇。」Gloria自爆喜歡露背,天生麗質的她坦言甚少保養:「我啲朋友都好羨慕我背脊好滑,啲女仔朋友都成日摸我!」

對於愈來愈多新人入行,Gloria笑言未驚過,只會堅持做好本分:「我唔會諗要同邊個競爭,亦唔會靠人,我每年都想出一本屬於自己嘅寫真,對得住自己就OK!其他人除衫除到咩程度我就要超越佢?我一定唔會!咁嘅話永遠都係惡性循環。」

遇熱情粉絲搣Pat

出名性感的Gloria,無論登台還是出席活動都成為焦點,因此遇到「唔安分」的Fans亦在所難免:「試過遇到好熱情嘅Fans,攬住我要錫我,有時連女仔都係咁,仲會扯我啲衫、捉住我隻手,我都接受到,因為佢哋都係鍾意我,唔好掂到敏感部位就OK!最誇張試過有人搣我Pat Pat,但係太大班人,我掉轉頭望已經唔知元兇係邊個!不過我都明有時去酒吧工作,佢哋飲咗酒情緒比較高漲,我就要保護自己,會提高警覺!」

愛情順其自然

工作太忙,Gloria無奈表示即使遇到適合的對象,甚至開始發展,最後都難以維持:「我成日唔喺香港,飛嚟飛去做嘢,感情淡咗大家冇搵大家,可能冇講分手就已經冇聯絡!每一段感情都好深刻,愛情對我好重要,因為另一半會陪住你一生一世,我好想有一個人照顧自己。無奈我啲對象都好花心,見一個愛一個!不過我唔會刻意去搵,順其自然啦!我好鍾意幽默嘅男人,同佢哋一齊每日都好開心,另外就係運動型,特別係識跳舞嘅!加上大隻又有肌肉嘅就最正,攬住佢會好舒服、好溫暖、好有安全感!」