阿刨落實年底演《紫釵記》

名伶龍劍笙（阿刨）上月在香港完成25場粵劇折子戲《任藝笙輝念濃情》後，宣布將於今年12月23日起，假香港演藝學院演出十場《紫釵記》，阿刨闊別經年再演長劇，除答謝戲迷厚愛，亦有感當年獲恩師任劍輝和白雪仙指點，因此希望提拔梨園新進，一盡粵劇承傳之責。

主辦單位新娛國際負責人丘亞葵（Vigo）昨日接受電話訪問時說：「之前一直游說阿刨演長劇，但佢擔心合作人選，直至上次做完《任藝笙輝念濃情》，佢同一班年輕演員合作得好開心，覺得佢哋好有潛質，加上阿刨覺得佢師傅任、白教咗咁多嘢畀佢，佢都要為粵劇做番啲承傳工作，所以《紫釵記》花旦會係《任藝》合作過嘅李沛妍同鄭雅琪輪流擔任，並由任冰兒擔任藝術顧問。至於其他角色都會用新人，包括梁煒康、文華及黎耀威等，畀呢班粵劇新苗同阿刨做對手戲，加速成長！」

多留港三星期

Vigo表示阿刨相當重視這個Project：「佢原定做完《任藝》就返加拿大，但為咗《紫釵記》多留三星期，同我哋商討成個劇嘅安排、影造型照，然後先返加拿大過年，呢段期間佢仲不時提點新人演出注意事項。其實阿刨揀演《紫釵記》係因為裏頭有好多書生、小姐戲，寫李益同霍小玉嘅感情亦寫得好到，阿刨好鍾意呢個劇。（只演十場，滿足唔晒所有戲迷？）阿刨相隔多年再演長劇，都知戲迷會好關注，但香港演出場地難求，請戲迷留意稍後公布嘅售票安排。」