錢嘉樂、黃智雯（Mandy）及朱千雪（Tracy）等昨日於電視城為無綫劇集《拆局專家》開鏡拜神。提到《拆》劇不乏動作場面，嘉樂對此表示零難度，但笑言與智雯的親熱鏡頭令他頭痛！他搞笑地自爆太太湯盈盈「望實」劇本內的咀嘴戲份，老婆更主動要求率先「試戲」：「佢睇住我劇本有冇咀戲，如果有就話可以同我試吓戲先！（盈盈監場？）唔會，所以備案好緊要！（咀戲投入唔到？）做咗咁多年分到（太太及工作）嘅！」

朱千雪（左起）、錢嘉樂及黃智雯將於《拆》劇上演精彩對手戲。

特意為該劇減肥的嘉樂更為黃智雯「惡補」飛車技術：「試坐佢車都幾驚，佢連指揮燈都唔知喺邊，好似冇牌咁！」Mandy興奮地表示獲對方傳授絕技：「佢坐隔籬教我單手捽軚！不過我有牌四、五年，都仲好懵同緊張！」而飾演電腦黑客的Tracy則笑言曾於外國玩電腦遊戲時，因下載過量數據而被警告。