貴為星二代的影壇新人黃愷傑憑俊朗面孔及實力勇闖影圈，無懼父母黃錦燊與趙雅芝光環下的壓力！他喜獲父母送上支持，除了投資電影公司力捧外，曾與影帝周潤發合作的母親更樂意「碌人情卡」，邀請發哥合作！

趙雅芝和黃錦燊望兒子黃愷傑在影壇闖出頭。

黃愷傑貴為國奧力捧新星，不乏發揮機會。

由陳欣健擔任總裁的國奧影業舉行發布會，楊受成、岑建勳都賞面撐場。

國奧影業總裁陳欣健、黃錦燊與趙雅芝夫婦及兒子黃愷傑、許冠文和樂易玲等昨晚現身尖沙咀，出席國奧亞洲電影計劃戰略發布會《From Boy To Man 國奧首映禮》。陳欣健即席宣布公司的發展方向，透露將在港及內地展開電影產業合作，席上又象徵式送贈遊艇予旗下力捧的黃愷傑，寄語年輕一代將精神發揚光大。

陳欣健全力支持

提到公司簽下拍檔黃錦燊的兒子黃愷傑，陳欣健說：「佢好有條件，簽佢係負責成立藝員部、內地拍檔于洋嘅主意，佢好鍾意愷傑。之前有同黃錦燊傾過，知道愷傑冇經理人，嚟緊喺香港同內地都有配套支持佢。」他又透露公司會以在內地上映電影為主，當中的重頭戲是投資8,000萬、由許冠文自編自導自演的新片《打虎》。貴為國奧力捧藝人的黃愷傑，除了演出《新兵正傳3：蛙人傳》外，又將在《我曾路過你美麗》擔任男主角。

身為投資者之一的黃錦燊與家人先後到場，但拒絕合照，問到是否投資電影為兒子鋪路？他說：「我做電影製作，係內地拍檔主導做埋藝人管理。」提到父親拒絕合照，黃愷傑說：「唔清楚，佢想我靠自己獨立，佢有佢做製作，我有我做藝人。（做星二代有壓力？）還好，會努力做好本分。（父母有畀意見？）主要係我同經理人決定。」

趙雅芝笑言會在精神上支持兒子的演藝工作，提到曾與影帝周潤發合作《上海灘》及《播音人》等經典作品，現時兒子備受力捧，會否考慮邀請老拍檔合作，帶兒子打入內地市場？她說：「國奧嚟緊有好多新戲，有啱嘅劇本當然會搵發哥，如果需要我打呢個電話，當然會幫手！」