Nicki Minaj高中墮胎知錯

記：記者　N：Nicki Minaj

記：你嘅新碟好快會推出，跟住會忙啲咩？

N：雖然新碟已經準備就緒，但仲有唔少後期工作，我哋整咗一條15分鐘嘅短片準備喺iTunes推出。我都有落手落腳做，依家修葺同調校顏色，呢啲小事如果做唔好會變成大件事，所以我會睇得好緊，如果我咩都唔理的確會慳好多時間，但我唔會。

記：你係咪咩事都會親力親為？

N：感恩節前一晚我都喺錄音室度過，有四、五首歌要處理混音，每個音每個字我都要調校好，如果我嘅音同拍子唔啱會再錄過。為咗處理呢啲工作，我錯過咗三班機，甚至唔能夠同阿哥慶祝生日，但我經理人Call咗我2萬幾次問我新碟做成點，我可以點做？

記：新唱片會以咩做主題？

N：呢張唱片比以前更注重歌詞，重點係讓歌迷知道我嘅私生活同我一直以來嘅秘密。好多時我幫其他歌手Rap歌都會集中喺歌詞，但到自己灌錄唱片時就會諗：「大家都知我強項，我唔使喺呢方面做咩證明。」但事實並非如此！

記：你寫歌詞有咩心得可以分享一下？

N：我好討厭有啲歌手自誇寫歌詞唔押韻，又或者吹噓係快槍手，但寫出嚟完全係垃圾，好似Jay Z同Wayne拚命吹噓自己，令人渾身唔自在！如果成績差呢？請坐低，思考一下有咩新意念可以寫，我寫流行歌嘅策略好唔同，唔會注重歌詞，就算唔識英文嘅人，單憑音樂都會知道係有趣嘅歌。

記：你以前喺學校讀戲劇時生活係點？

N：我剛返學時好怕接觸其他同學，同班只得一個黑人同學，但之後我愛上咗佢哋，其中一個好朋友係白人，我哋無話不說。呢間學校改變咗我嘅生命，唔使着校服，同學可以隨意表達自己，我每日都會檢討自己過去，之後正確地走向未來。

記：你高中時曾經大肚，有過墮胎經驗？

N：經手人係學校嘅師兄，係一個好恐怖嘅錯，我好憎恨佢。我發現自己懷孕後感覺就死，雖然有諗過要個BB，但我嘅宗教、年齡同我阿媽都係因素之一，佢到依家都唔知我曾經墮胎。當時我選擇墮胎係因為我冇嘢可以畀BB，我未準備好有自己嘅孩子。

記：你點睇女權主義？

N：我唔鍾意標籤自己，但我相信女人可以控制自己事業，大公司睇到一個年輕黑人女仔可以幫佢哋大賣產品係好重要，好似我個MV《Anaconda》，我係一個大籮女人，我代表想性感同跳舞嘅女生，如果你有一個大籮柚？喪扭！理得佢？

天后良伴

Nicki憑實力獲不少頂級歌手垂青，曾多次與天后Rihanna及麥當娜（Madonna）等合作，但她最近與娜姐合唱的歌曲《B**ch I'm Madonna》於iTunes的成績卻不太理想，推出一周只排名188位。而娜姐早前因新碟未完成的歌曲被黑客在網上公開而留言喪鬧。

是非紅人暗藏殺機

出道逾十年的Nicki近年突然走紅，去年還一嘗拍戲滋味，與新婚的金美倫戴雅絲（Cameron Diaz）及大胸女模Kate Upton等合演笑片《小三大聯盟》（The Other Woman）。惟人紅是非多，她與天后瑪莉亞卡里（Mariah Carey）主持《一夜成名》（American Idol）時被偷拍到吵大鑊，瑪莉亞更指若有槍會殺死Nicki，極具火藥味！

此外，Nicki早前推出細碟《Anaconda》的趷籮封面照被網友惡搞，「不文女歌手」Miley Cyrus亦改圖換上自己的頭，令Nicki躁爆留言興師問罪。