林欣彤拉鏈拉甩痣

歌手林欣彤（Mag）、許廷鏗及馮允謙前晚一同出席時裝品牌i.t參與的「香港國際時尚薈萃2015」年度時裝盛事，以露腰裝示人的Mag露出肚皮上的痣，記者笑她肚懷大痣，她笑說：「係呀！佢已經曝過光，不過之前有次着件有拉鏈嘅衫，唔小心拉埋粒痣，甩咗少少，跟住流好多血，爆晒缸！我同媽咪講話想脫咗佢，但嫲嫲話粒痣係好，後來又自己生番出嚟，所以冇脫到。」問到還有沒有隱秘地方有痣，她說：「兩邊腋下，啱啱一個三角形。（腋下痣有冇見過人？）冇，我平時唔會無啦啦舉高手唱歌。（男朋友有冇睇過？）媽咪睇過！」而今年在樂壇成績不錯的許廷鏗則透露，現時忙於歌手及牙醫工作，十分忙碌。