林峯昨日親自到賀好友鄧智偉與莊冬昕合資近千萬港元的娛樂製作公司開幕活動，但他否認是「幕後老闆」，有指早前舉行的勁歌頒獎禮因他缺席而失色，而林峯則力撐無綫，指各台普遍收視都較以往遜色。

林峯指受網絡衝擊，所有電視台收視都下跌。

莊冬昕（左）開製作公司，林峯與樂易玲畀面撐場。

鄧智偉（右）與林峯咬耳仔，未知是否即場邀入股。

Eddie與蔚雨芯一起撐場。

前無綫音樂總監鄧智偉和音樂人莊冬昕攜手開設娛樂製作公司，一眾圈中好友林峯、陳百祥、狄易達、無綫高層樂易玲、方逸華、蔚雨芯及EO2的Eddie都有到賀。身為老友的林峯更安排到台上祝酒，對於有指他是「幕後」投資者，林峯連聲否認：「冇、冇、冇，但佢公司好多合作夥伴都係我朋友。（冇諗一齊做老闆？）冇喎！佢哋係音樂創作人，我只係藝人，我又有自己公司，但新碟都會交畀佢哋做，早喺未簽英皇前我哋已經籌備新碟。」

收視未計點擊率

談到有指缺席勁歌頒獎禮，令收視不及去年，林峯笑說：「唔關我事，嗰晚要出席華鼎獎，加上年幾冇出新歌，都冇歌入選。」他又力撐無綫：「其實依家無論咩節目、邊個台，所有收視都稍為低過以前，因為網上又有得睇myTV重溫，係會分薄咗！所以應該計埋網上點擊率，唔只係計收視。」至於老闆鄧智偉則表示與莊冬昕分別投資了七、八位數字，問到可有叫林峯入股？鄧智偉笑說：「歡迎任何人投資入股，佢可能睇睇吓會有興趣。」

樂易玲否認離巢

另外，有報道指因與無綫高層余詠珊不和，年中將過檔nowTV的樂易玲，笑言不和傳聞已傳足三年多，過去兩位主席都曾為她清澄，所以不再回應。問到今年可會繼續在無綫返工？她笑說：「唔返TVB返邊度？（傳nowTV高層何麗全搵你過檔？）一定冇，何生點敢呀！」問到與余詠珊相處如何？她說：「珊姐性格係好率直嘅人，好同唔好都會講，我哋相處冇問題。」