祖藍打造王宮鬧上警署

王祖藍與李亞男「長短腳之戀」，先於去年的無綫台慶上演一幕至爆求婚，並落實下月14日情人節拉埋天窗！非亞男不娶的祖藍，早於2013年7月豪擲1,340萬元購入大埔雅景花園逾千呎海景獨立洋房，更斥巨資裝修！據知，新居由祖藍一位在英國任職設計師的好友打造，且用料名貴，一磚一瓦都用上頂級物料。如今婚期逼近，二人的豪宅裝修卻搞到一鑊泡，搞足15個月依然漏水，更發生錢銀糾紛，最後鬧上警署！

被指冇出糧

昨日王祖藍與未婚妻李亞男出席奇華嫁喜餅活動，祖藍在酒店宴會廳親身「擔」禮盒過大禮，向準王太李亞男送上禮餅，並在活動上分享二人的拍拖點滴，更應老友兼司儀阮兆祥在台上要求「合巹交餅」。

不過，祖藍在接受訪問時則大爆裝修愛巢發生「小插曲」，他表示裝修費埋單竟多出一截兼被對方威脅，他說：「我最初畀咗九成訂，最後個尾數比最初多咗七成！但裝修公司指我唔畀錢，就唔畀番車房鎖匙，之後裝修公司報咗警。」祖藍又表示當時事件未公開，已有傳媒致電給他，指他沒有出糧給裝修工人，祖藍笑說：「警察幫我備咗案，不過警察冇幫佢。」

單據不准睇

打造新居問題多多，祖藍昨日接受電話訪問時再慨嘆：「本來係舊年8月收屋，去到11月先有，不過都冇辦法，一定要收到屋，因為我搬出去住嘅臨時屋都租約期滿。其實我好準時畀錢，不過裝修費多咗，都係想睇吓張單了解，本來裝修師傅話畀我睇，最後又唔畀我睇。」

雖然祖藍呻爆新屋久經15個月裝修至今依然漏水，不過他則安慰自己，他說：「早排冬天都冇咩落雨，都有漏水，可能係呢個愛巢引狼入室，不過小插曲嚟啫！其他所有人都好幫得手，最緊要快啲搞掂！」