為慶祝樂壇校長譚詠麟（阿倫）入行40周年，電台特別邀他與圈中新知舊友一同打造《銀河歲月》廣播劇，在錄音過程中勾起不少集體回憶，令阿倫心中泛起一絲絲暖意。

入行40周年的阿倫，喜獲電台特別打造廣播劇。

嘟姐大讚阿倫錄廣播劇有一手！

阿倫笑言曾被林珊珊的童顏「欺騙」。

克勤與樂隊Mr.齊齊為阿倫的廣播劇錄音。

廣播劇集合超過四十位歌手、藝人及DJ「聲情」演出，一眾嘉賓以接力形式為廣播劇錄音，阿倫堅持留守錄音室與每一位嘉賓同步錄音，他說：「原來錄20集廣播劇要好長時間，一大疊劇本有好多對白，對我嚟講係一個挑戰，我留喺度一齊錄，有交流，出嚟效果會更好。」

當林珊珊童工

鄭裕玲（嘟姐）及林珊珊出現錄音室，令校長驚喜萬分，更勾起不少回憶。由1979年開始跟阿倫合作的嘟姐，大爆阿倫於錄音過程中「Natural High」，她說：「場戲好正經，但佢突然爆肚同搞笑，真係畀佢激死！講真我都估唔到佢錄廣播劇都好掂，之不過……佢都係唱歌好啲！」雖然被窒，但阿倫仍開懷大笑。珊珊則笑言為校長重出江湖，校長笑說：「當年珊珊入行做DJ，我仲以為電台請咗個童工，見佢半夜三更喺街周圍行，咪主動揸車送佢返屋企，後嚟先知佢已經好大年紀，哈！」

克勤錄音有「陰謀」

與校長合作無間的李克勤則笑言答應錄廣播劇是另有所圖：「錄完希望阿倫有演唱會飛畀我就好喇！依家全城缺飛，我欠好多飛債！」克勤形容阿倫就像他爸爸，多年來一直照顧他：「我好感恩有一位咁有分量、輩分咁高嘅拍檔。」