44歲李嘉欣雪卵追女
「大美人」李嘉欣與已故船王許愛周後人許晉亨育有一子許建彤（Jayden Max），雖然她早前曾揚言「封肚」，但一直恨生女的她原來並未死心！嘉欣昨日自爆雪卵「追女」，更揚言會搵代母生B女，誓為小JM添個妹妹！
李嘉欣自爆雪卵「追女」，誓為小JM添妹妹！
與Celine出席活動時，情不自禁拖實Celine，恨女恨到出晒面！
低胸上陣的李嘉欣，為遷就Celine高度，不介意烏低身！
（設計對白）
現年44歲的「大美人」李嘉欣（Michele）與52歲的已故船王許愛周之孫、家族資產逾200億的老公許晉亨結婚後，多年來專心湊金叵羅許建彤（Jayden Max，小JM）。雖然老公身家億億聲，大有能力養多個，但活潑好動的小JM已經獨佔Michele所有心神，令她不時公開大呻湊仔「苦況」，最終更打消念頭宣布「封肚」！不過，Michele近日又突然改變心意，昨日更自爆雪定卵子隨時生女！
湊仔得番半條人命
Michele昨日以紫色低胸連身裙上陣，與「美心妹妹」楊鎧凝（Celine）孖住出席美容品牌活動，大騷香肩的Michele一見Celine即母性大發，當Celine送上化妝品，Michele更情不自禁伸手拖實她，恨女恨到出晒面！Michele受訪時坦承恨生女，惟已屬「高齡產婦」的她自覺「抿啲」：「可能第一個係女會易啲照顧，但男仔好好動，要同佢奔奔跑跑，我依家得番半條人命！見到人哋啲女，就覺得好可愛。」
曾揚言「生一個夠晒數」的她，被問到是否打算追多個時，即表示已做好準備，惟思想傳統的她不考慮收養，更稱已雪定卵子，搵代母生B：「可能會搵代母。（雪定卵子？）係一個選項。（思想好傳統，一定要兩夫婦基因？）搵代母，都係自己基因，收養要好多理由。（已經雪咗卵子？）有咁做，雪定咗。」做足功課的她又透露胚胎比卵子保存期限更長，可謂恨女恨到發燒！她說：「成為咗胚胎可以保存耐啲。（要幾年內成事？）可以好耐都得。」承認雪卵的她更笑言經常與老公討論生仔話題！
拒靠科技揀BB性別
雖然小JM今年踏入4歲，但Michele直言不怕他與「妹妹」有代溝：「唔擔心，我同姐姐都隔四年，最重要睇吓點教。」問到會否透過人工受孕揀選BB性別時，她說：「我知科技乜都有可能，但我哋唔會咁誇張。」雖然她「口裏說不」，但其實她早已練定體能，實行做弗爆媽咪等湊B女：「不過老公覺得有多個可能都會吃力，佢鍾意親力親為去照顧。我自己都會好勤力做運動，要弗啲先可以對付小朋友。」
現今科技發達，人工受孕絕非新鮮事，近年不少名人都加入人工受孕行列！恒基兆業創辦人李兆基長子李家傑2010年榮升三胞胎之父，惟有消息指他在美國找代母生B！而葡萄牙萬人迷球星基斯坦奴朗拿度（C朗）亦被爆搵代母生仔，做未婚爸爸，前晚還帶兒子出席國際足協金球獎頒獎禮，大晒兩父子的溫馨場面！
