曾參選中國小姐的女藝人柯嘉琪（Kiko）早前與一班好友開P慶生，現場有表演者扭氣球，又有魔術師變生日禮物，歌手洪杰及朱紫嬈亦有到場祝賀，壽星女相當感動！問到生日願望，修讀傳理系碩士的Kiko希望畢業後創業，兼顧網上生意及藝人工作，希望每年都有所進步：「計劃出書，亦都希望拍多啲電影，尤其係動作片，想練武功或者舞蹈減吓肥！（恨結婚？）每個女仔都想有個白馬王子，但要求人哋之前，自己都要做到個有質素嘅『公主』先。」

柯嘉琪收到勁大紮玫瑰花及手袋蛋糕做生日賀禮，實開心死啦！