苗僑偉為慶祝老婆戚美珍53歲生日兼銀婚紀念，前晚秘搞驚喜派對，邀得劉嘉玲及林峯等圈中好友到賀！席上與兄弟開金口唱情歌的苗僑偉「冧爆」老婆，令她當場爆喊！

三哥約埋大班好友為老婆賀壽兼慶銀婚，難怪三嫂切蛋糕時笑到見牙唔見眼！

林峯送酒賀三哥銀婚。

謝天華帶同腹大便便的老婆到賀。

結婚25年的苗僑偉（三哥）與戚美珍（三嫂）一直恩愛如昔，三哥前晚趁三嫂正日牛一，在跑馬地馬場舉辦驚喜派對！三哥細心挑選賓客名單，誠邀圈內外的好友為老婆慶生，包括劉嘉玲、曾志偉、林峯與謝天華夫婦等。當日他又提早與索爆大女苗彤入場打點，如設下「苗僑夫與苗僑Wife」為題的布景板，細仔苗俊則因身在外地而缺席。

感激組幸福家庭

據悉，三哥專誠為三嫂送上「銀婚蛋糕」，又與黃日華及湯鎮業上台獻唱冧歌，令她感動落淚。其後，三哥受訪時深情感激老婆多年來相伴：「我近年多數喺國外做嘢，好奔波又好凍，我想多謝老婆陪我度過每一個寒冬。（當眾啜啜？）群眾要求我哋咀，我哋感情不嬲好，咀嘴一啲都唔出奇，好多謝佢畀咁幸福嘅家庭我！」提到送甚麼生日禮物？三哥踢爆三嫂渴望他與多年兄弟飯敍再會，席上他更開金口獻唱歌曲《越難越愛》晒愛：「我有叫埋偉仔（梁朝偉）嚟，可惜佢要去北京做嘢，所以由嘉玲做代表。成晚以唱歌為主，做和音嘅我仲邊唱邊企，企到腳痛都唔知！」而張兆輝稱趁拍劇空檔抽空現身，林峯帶酒獻禮，謝天華則扶實大肚老婆撐場。

嘉玲代偉仔撐場

至於「代夫出征」的嘉玲在微博開心Share派對盛況，好讓身在內地的偉仔感受現場情況。忙於排練舞台劇的她昨日稱對老公偉仔缺席感遺憾，並盛讚場內氣氛感動：「佢哋拍咗拖8年，結婚25年，總共行咗33年人生路！」而偉仔昨日與王家衛及章子怡等《一代宗師》劇組人員在北京出席該片的「謝師宴」，慰勞教打功夫的詠春師傅，席間齊齊擺出功夫甫士。