吳千語、鄧麗欣及何佩瑜等藝人昨日悉心打扮到旺角出席「天馬娛樂」老闆黃百鳴開設的「Cinema City朗豪坊」開幕禮，但卻「冷」不提防被穿得密密實實的周秀娜「飛釘」搶盡風頭。

穿上羽毛裝的娜姐自嘲「着到成隻雀咁」。

「封胸」出席活動的娜姐被發現疑似「飛釘」，乜咁唔小心呀！

黃百鳴與一眾嘉賓為戲院開幕祝酒。

Stephy無懼寒風以大露背出席活動，可惜仍被搶去「峰」頭。

周秀娜以白色長袖冷衫亮相，原本並無「殺傷力」，但卻驚現「飛釘」情況，成為焦點的娜姐一臉尷尬說：「係咩？（有冇戴Bra？）有，日日都有。（咁失策？）冇諗過會現形，一向好小心，好少會咁樣。（冇所謂？）還好，一陣部戲叫《飛鳥俠》，自己成身羽毛着到成隻雀咁，以為飛得起添，下次小心啲！」現場所見，娜姐的頸上亦離奇出現紅印。

吳千語日本拍拖滑雪

以露臍裝亮相的吳千語透露農曆新年會與男友林峯及一行十多位朋友到日本滑雪，千語自嘲滑雪技術屬BB級：「因為一年玩一次所以仲係BB級，佢（林峯）學得快啲。（男友做『人肉墊褥』﹖）我一跌佢就笑我囉！（新年去廈門拜年？）佢新年好似要錄唱片。（自己去拜年？）好似尷尬啲，都係一齊去好啲。」

鄧麗欣（Stephy）大露背性感到賀，對於好友楊愛瑾（Miki）獲男友永安太子爺郭永淳發聲明力證並非「小三」，問Stephy可覺得聲明發得太遲？她說：「佢男友好好，發聲明等大家知道發生咩事，冇嘢係怕遲嘅，可能之前太多誤會未解決到，未係時候啫，依家真係好圓滿。（Miki打算結婚？）佢又冇講過，我哋應承過大家結婚要同對方講，唔可以睇報紙先知，希望佢兩個開心啦！」

黃百鳴登「陸」開戲院

另外，「天馬娛樂」老闆黃百鳴受訪時透露戲院租約為十年，戲院名字也用上當年新藝城的英文名以作紀念。問到會否在香港開設其他戲院？他說：「唔會，因為想發展內地院線，香港就一定要有戲院，呢間係香港旗艦店。（喺內地邊度開？）上海嗰間已經簽咗約，其他地方仲傾緊，冇目標要開幾多間，只係想打造高質素嘅戲院。」