蔡卓妍（阿Sa）聞得好姊妹Yumiko早前佗住三個半月身孕拍潛水戲後，大讚她是專業演員：「Yumiko真係好堅呀！」不過作為朋友，阿Sa大呼：「好擔心囉！佢太『勇』喇！無論點都好，應該先顧及自己係乜身體狀況囉！真係只此一次，下不為例！」阿Sa望Yumiko懷孕後凡事小心，幸好現時肯乖乖地留家安胎。

好友Yumiko「以身犯險」，令阿Sa很擔心。

而蔡少芬佗幼女信兒時，因乘飛機遇氣流令胎盤有裂痕滲血，昨日得知Yumiko佗B潛水時都戥她驚險：「作為媽媽，我會事前問清楚醫生，不過佢三個半月都穩定嘅，相信Yumiko都好錫BB！（你覺得危險？）我又唔清楚佢潛水時間有幾耐，但做媽媽都應該有心理準備！」至於剛生完B的陳倩揚亦表示作為媽咪很清楚自己身體，不過她會小心意外發生：「只要有萬分之一機會都唔好畀佢發生。」同是孕婦的周家蔚則表示對潛水不太認識：「不過大肚婆游水都係好嘅。」

孕婦遇水壓 醫生稱高危

婦科醫生余啟文說：「潛水就一定唔鼓勵，因為潛水屬高危險性運動，除擔心水壓問題外，喺水入面有遇到碰撞嘅可能，但游水係冇問題嘅。」