已有5個月身孕的鄭希怡（Yumiko）自佗B後吸金不斷，不過勇字當頭的她竟拿「吸金寶寶」較飛，連人帶餡在嚴寒天氣下拍落水戲，更潛至4米深水底，嚇得Yumiko雙親即飛到現場睇實「寶貝孫」！

拍攝時已懷有三個半月身孕的Yumiko潛到池底，醫生都話危險！

Yumiko在水面舉雙V，似乎不太擔心。

Yumiko上水後急急用毛巾包裹身體，免得冷病。

鄭希怡自佗B後事業一直順風順水，單是去年12月便有10單各值6位數酬勞的工作，而去年9月補擺喜酒時，未知懷孕的她獲內地導演藍志偉以7位數重酬邀她為電視劇《古鏡》擔任女主角，同年11月中即隨大隊到湖南開鏡。

閉氣10秒 嚇壞雙親

Yumiko當時已有三個半月身孕，為履行承諾惟有堅持上陣，在只得十餘度的嚴寒天下拍攝泥水掙扎的戲份，其後再拍一場潛水戲！

導演體諒Yumiko粗身大勢，曾希望等天氣回暖再拍，豈料等足20日仍未回暖，惟有移師北京一個室內溫水池拍攝。

拍攝時，Yumiko要佗住BB在4米深的水底閉氣10秒，令父母擔心得立即飛到北京監場，導演也提醒她一有異樣要立即打交叉手勢示意，最後拍了10餘Take順利完成。

報知遇恩 唔用替身

首次佗B的Yumiko可謂不錫身，她曾請教醫生意見拍落水戲屬安全，但心虛表示不敢問潛水戲，又說：「不過我買咗潛水衣保暖，導演係我伯樂，當年第一套內地劇都係佢搵我，所以今次佢搵得我一定幫。」其經理人霍汶希說：「有同導演要求用替身，但唔得，有諗過撻訂唔做，但Yumiko覺得之前都拍咗咁多，突然唔拍對劇組好唔公平。」Yumiko老公則百分百支持老婆。另外，Yumiko早前獲朋友送贈粉紅色嬰兒衫，她大賣關子不透露BB性別：「唔講住，不過老公知道好開心！」