今年4月本報爆出，指已移居加拿大的阿刨回港再踏台板，是因「新娛國際」董事丘亞葵（Vigo）由2011年起開始不斷游說，終在其誠意打動下才答應回港演出。雖然劇中有花旦請辭，並換了兩位粵劇新花旦李沛妍及鄭雅琪頂上，但阿刨仍落力在加拿大操練，狀態甚好。而主辦單位原定只開十場，但因戲迷反應熱烈，故連續兩度加場，總共開25場。

25場演出圓滿落幕，Vigo功不可沒！

主辦單位新娛國際負責人丘亞葵（Vigo）前晚在台上致辭時表示，為演出籌備了三年，感覺魂牽夢繫，又指阿刨為戲迷而作出了種種付出，他說：「喺再開（即由文化中心移師演藝學院演出）之後嘅第一、二場，阿刨唔舒服，我建議不如停一停，但阿刨話唔得，見到佢頂住喉嚨痛、流鼻水都要做落去，我好痛心。我希望未來，只要佢願意，我哋都可以繼續並肩作戰，撐到底！希望下次演出唔使再等三年咁耐。」

Vigo昨日接受電話訪問時說：「阿刨嗰陣病到聲沙、感冒、流鼻水，向來唔鍾意睇西醫嘅佢，第二日都去咗打止痛針，撐住繼續演，我好感動！我有個心願，希望今次做完折子戲，下次做長劇，希望阿刨可以好好考慮！」