阿姐汪明荃和黎耀祥昨日到深圳為下月三日無綫節目《慈善星輝仁濟夜》中的《帝女花之庵遇》錄音，阿姐坦言內地錄音室較香港便宜，她又親自執筆教記者寫如「梆黃」等粵劇專業名詞，心情大靚。

黎耀祥與阿姐合唱粵曲，乘機偷師。

自認是粵曲外行人的祥仔說：「阿姐今次帶我見識好多嘢！第一次有樂師咁唱粵曲！」又賣口乖大讚阿姐有經驗：「好多細節，阿姐教咗我好多拍子同換氣位。」問到是否之前與蓋鳴暉合作做盛世天戲劇團的《星海留痕》後上癮，他說：「上次係舞台劇，但真係接觸多咗，以前係鍾意聽，但冇咩途徑去練。」而17年前曾做阿姐演唱會嘉賓的他更膽粗粗地表示會繼續唱大戲：「睇吓可唔可以加入八和會館！」氹得身旁的阿姐笑逐顏開。