黃曉明周杰倫鬥快做羊爸
娛樂圈男神黃曉明和周杰倫早前相繼宣布喜訊，會於明年分別與女友Angelababy及昆凌拉埋天窗。《東網電視》節目《娛樂演．講．聽》特地邀請堪輿學家麥玲玲預測來年圈中喜事，兩位「準新郎」兼兩大男神，誰有機會更快成為「羊爸爸」呢？
落實迎娶Baby的曉明，被批羊年「雙喜臨門」。（設計對白）
麥玲玲擔任《娛樂演．講．聽》嘉賓，預測藝人羊年運程。
霆鋒與王菲世紀復合後，二人的「婚期」即成焦點。
資訊又快又新的《東網電視》，節目《娛樂演．講．聽》一連兩集邀請了香港堪輿學家麥玲玲預測圈中人的羊年運程。近年圈中男神紛紛「封盤」，現年37歲的內地一線小生黃曉明早前豪言定下婚期，表明羊年會迎娶比他年輕12載的女友Angelababy（楊穎），一直憧憬組織家庭的他透露，二人都喜歡女兒，希望婚後生個BB女。至於台灣天王周杰倫（周董）宣布下月18日與21歲女友昆凌拉埋天窗，現年35歲的他早前風騷大爆婚後要開行Turbo「造人」，揚言要生夠五個組成樂隊。不過麥玲玲師傅預測曉明似乎會率先跑出做「羊爸」，由億萬小生升呢為億萬爸爸，她說：「黃曉明明顯喺羊年同馬年有結婚運，分分鐘會雙喜臨門。而周杰倫就會結婚先，但羊年就未必有機會生BB。」
「怕老婆」類
出名錫女友的曉明，自公開戀情後，一直視之如公主般對待Baby，Baby亦曾開口大讚曉明識得搞浪漫，令她經常冧爆。麥玲玲亦指出，其實黃曉明與謝霆鋒的命格都是對老婆不差：「兩個其實心底係怕老婆，佢哋內心雖然大男人，但到真係對住老婆嘅時候，都係會忌三分。相格嚟講，兩個都係眉濃嘅人，係唔錯嘅男人，對家庭嘅責任感強。但因為靚仔，異性緣一定強。」
鋒菲唔結又分?
至於霆鋒雖然與張栢芝離婚，但他與王菲相隔十一年再次復合，麥玲玲亦睇好，並說：「我都睇好佢哋，不過到2016年猴年，即係霆鋒本命年時如果再唔結婚，就會有變數。」她續指羊年是一個是非之年：「羊年嘅時間，三壁入宮，三壁係一個鬥爭嘅星，所以全年嚟講是非同嗌交會特別多，兼且五黃星係對宮，即係以口搵食嘅朋友，歌星、表演、主持都容易身體健康唔好，容易聲沙。」
另外，被預測有機會做「羊爸」的曉明，日前參與內地節目《來吧！灰姑娘》，與一隻老虎同台亮相，作勢騎虎的他高舉勝利手勢，一副得戚模樣，幸好老虎乖乖趴在地上，而粉絲卻不禁為曉明抹一額汗。節目後，曉明留言表示：「這年頭，為上個電視也真不容易。」
