「寸嘴Barbie」夏尉喻聖誕冇假放，或會在寒冬拍落水戲！搞笑的她自創食辣椒保暖大法，未知是否近得笑匠周星馳多，Barbie無厘頭地以紅辣椒晒演技，將辣椒變成魔鬼角、木偶鼻、煙斗、狼爪及唇膏，夠晒可愛！

自製狼爪的Barbie嚟招「Show Hand」，夠晒「胸」狠！

扮魔鬼的Barbie，會唔會Cute得滯？

Barbie盡得星爺傳授搞笑大法，你以為佢係辣椒？其實係新款煙斗！

想要木偶鼻唔使靠整容嘅，學Barbie教路用辣椒就得喇！

性感女星「寸嘴Barbie」夏尉喻趁聖誕節身穿紅色低胸裙，化身「Big」爆聖誕女郎，今年人氣急升的她被周星馳睇中，有份參演電影《美人魚》，不過她今年聖誕節卻冇假放，更大有可能要在嚴冬拍落水戲，自認怕凍的她想盡辦法保暖，終想到勁食辣椒禦寒！

演技大升呢

原本思路獨特的Barbie，未知是否與星爺相處得太多，無厘頭境界更上一層樓！拍攝當日她以紅辣椒表演「方法演技」，分別將辣椒變做魔鬼角、木偶鼻及狼爪，玩得興時更含住辣椒扮吸煙斗，她又以辣椒扮唇膏搽嘴，只見她相當投入，扮得維妙維肖，非常搞笑！她說：「可能底子比較虛，我好怕凍，喺香港都會着晒羽絨！其實我本身唔食得辣，但咁嚴寒，都買咗各種辣椒醬同辣椒加入飯菜度，好有效！出身汗的確暖好多，不過都出咗啲瘡瘡，要護吓膚！」

秘技防飲醉

Barbie在過往聖誕節會相約好友食大餐，她希望今年能抽空與朋友短聚，她又自誇浪漫型女友，曾送不少心思禮物予舊男友：「我會DIY禮物，畫過卡、織過冷頸巾同自製公仔，依家仲學識整刺繡吊飾！（最難忘送咩？）最勁梗係將自己當做禮物啦！」偶爾會與朋友飲酒慶祝的她未試過醉酒失態：「只會同相熟朋友玩，否則到一到就走，而且我飲兩啖就會扮醉，唔容許自己醉到貓。」