歌神張學友相隔七載終於推出新國語專輯《Wake Up Dreaming醒著做夢》,昨日他在台北舉行發布會,全程風騷滿面,唱片公司更出動30位巨星好友包括三大天王為學友拍短片祝賀,學友更以「歷史人物」來形容四大天王。

學友出席記者會時笑到四萬咁口,心情靚靚!

學友與一眾同事舉杯,預祝專輯大賣。

學友昨日在全亞洲發片記者會上宣傳於今日全球同步發行的新專輯,並即時展示歌神唱功演繹新歌《時間有淚》,他在台上更心情大靚,不時講笑搞Gag,司儀黃子佼問到新碟製作費超高,是否已花去唱片公司下半年的宣傳費?學友竟搞笑說:「我知錯了。(製作費要倒貼?)我的嗎?早知省點錢去做,我平時很儉。」而為賀學友出道30周年,唱片公司送上《醒著做夢》的黑膠碟及巨型珍珠戒指,象徵學友與環球三十載的「珍珠婚」。

黎明「蒲頭」最驚喜

現場播出超強陣容的祝賀片,雲集歌影視好友及合作藝人,包括三大天王、陳奕迅、梁朝偉、庾澄慶、吳君如、徐克及湯唯等30位巨星,對於「三王祝賀」,學友表示很感動,儘管已成過去,但畢竟是香港不可抹殺的時代。其後學友接受訪問時說:「冇諗過有三天王,城城都耐唔耐出嚟做嘢,但黎明都好耐冇出嚟,見都見唔到,搵唔到喎,係有驚喜嘅!」他又用「過去」形容天王時代:「係歷史嚟,大家都知,要面對現實,講四大天王已經係『歷史人物』,係近代史嘛!依家各自都發展好好。」

籲提防假門票

另外,因有指學友明年開30周年演唱會,現在內地購物網竟已出現訂飛消息,對此學友呼籲歌迷小心,因為他目前還未落實開騷:「等我開咗演唱會記者會先係真,網上手法層出不窮,會呃你,我演唱會都未有,收咗錢咁點呢?要小心啲。」